चिकित्सक नहुँदा इलाम अस्पतालको सेवा प्रभावित

पहाडी जिल्लाका लागि भौतिक पूर्वाधारले व्यवस्थित मानिने इलाम अस्पतालमा चिकित्सक नहुँदा बिरामीहरुले सास्ती भोग्नु परेको छ । ५० शैयाको उक्त अस्पतालमा दरबन्दी अनुसारका चिकित्सक नहुँदा र भएका मेसिनहरुपनि बिग्रिरहँदा इलामबासीहरु झापाका महँगा अस्पतालमा जान बाध्य छन् ।
इलाम गोदबाट माई भगवती बृद्धाश्रमका बिरामी लिएर आएका राजेन्द्र अधिकारीले बिरामीको एक्स–रे क्लिनिकमा गर्नुपरेको गुनासो गरे ।
सरकारले इलाम अस्पताललाई ५० शैयाको बनाएको थियो, भने आठ विशेषज्ञ डाक्टरसहित १४ जना डाक्टरको दरबन्दी तोकेको थियो । तर, अहिले अस्पतालमा पाँज जना विशेषज्ञ डाक्टर, ३ जना मेडिकल सुपरिटेन्डेन्ट र २ जना डेन्टल सर्जर मात्र छन् ।
इलाम अस्पतालमा दैनिक १५० जना भन्दा धेरै बिरामी आउने गरेका छन् । चिकित्सकलाई बिरामीको चेकजाँच गर्न हम्मेहम्मे पर्छ । साथै, अस्पतालमा भएका सीमित मेसिनहरु मात्रै भएका कारण अस्पतालको सेवा प्रभावित हुने गरेको इलाम अस्पतालका सूचना अधिकारी कुल प्रसाद देवानले बताए ।
पछिल्लो समयमा पाँचथर र ताप्लेजुङ्गका अस्पतालमा उपचार हुन नसकेका बिरामीको रिफर सेन्टर बन्दै गएको यस अस्पतालमा विशेषज्ञ डाक्टर नभएकै कारण दोहोरो समस्या हुने गरेको छ ।