खडका ईलेक्ट्रिक एण्ड सप्लायर्समा नया वर्ष २०८१ को उपलक्ष्यमा शुभकामना सहित इलेक्ट्रोनिक्स सामानमा बिशेष छुटको ब्यावस्था छ।



बजेट व्यवस्थापन विशेष समितिको प्रतिवेदन पारित गर्दै स्थगित भयो बागमति प्रदेश सभाको बैठक


 संवाददाता   March 13, 2024   145 जनाले पढ़िसके




काठमाडौँ । बागमती प्रदेशसभाले बजेट तथा कार्यक्रम व्यवस्थापन विशेष समितिको प्रतिवेदन पारित गरेको छ । दलहरुबिचको विवाद समाधानका लागि चालु आर्थिक वर्षको बजेट तथा कार्यक्रमहरुको व्यवस्थापन गर्न बनेको समितिका संयोजक नेपाली कांग्रेस बागमती प्रदेश संसदीय दलका सचेतक गोविन्द लम्सालले संसदमा पेस गरेका प्रतिवेदनलाई पारित गरिएको हो ।

 

बैठकमा सभामुख भुवन कुमार पाठकले विशेष समितिले तयार गरेको प्रतिवेदन छलफलको प्रस्ताव अघि बढाएका थिए ।

संसदमा पेस भएको उक्त प्रतिवेदनमाथि बुधबारको बैठकमा छलफल भएको थियो । प्रतिवेदनमाथि नेकपा एमालेका सांसद केशव प्रसाद पोखरेल, भरतबहादुर केसी, नेपाली कांग्रेसका सांसद मदुकुमार श्रेष्ठले छलफलमा सहभागिता जनाएका थिए ।

छलफलमा सहभागिता जनाउँदै एमाले सांसद पोखरेलले प्रतिवेदनले बजेट कार्यक्रमको व्यवस्थापनमा महत्वपूर्ण भूमिका खेल्ने बताए । आगामी आर्थिक वर्षको बजेट कार्यक्रम निर्माणका लागि पनि प्रतिवेदनले मार्ग निर्देशन गर्ने उनले बताए । प्रतिवेदनले उठाएका विषयहरुलाई सरकारले हुबहु र यथाशीघ्र कार्यान्वयनमा लैजाने उनले विश्वास व्यक्त गरे ।

एमाले सांसद केसीका अनुसार सरकारले गलत दिशाबाट अघि बढ्ने चेष्टा गर्दा संसदीय समिति निर्माण गरी निर्देशन दिनुपर्ने बाध्यात्मक परिस्थिति बनेको बताए । बजेट कार्यक्रममा भएका त्रुटिहरुलाई संसदीय समितिको प्रतिवेदनले समाधान गरेको र सो प्रतिवेदन आगामी दिनमा नजिरको रुपमा रहन सक्ने उनले बताए ।

कांग्रेस सांसद श्रेष्ठले समितिले निर्माण गरेको प्रतिवेदन शीघ्र कार्यान्वयन गर्न जरुरी रहेको बताए । आर्थिक वर्ष अन्त्य तीर रहेकाले प्रतिवेदनले उठाएका विषयहरुलाई सरकारले ३ महिनाभित्र नै सम्बोधन गर्नुपर्ने उनले बताए ।

सो छलफल समाप्त भएलगत्तै सभामुख पाठकले प्रतिवेदनलाई निर्णायार्थ पेस गरेका थिए । सभामुख पाठकले निर्णायार्थ पेस गरेको उक्त प्रतिवेदन सर्वसम्मत पारित भएको थियो । प्रतिवेदन पारित भएसँगै त्यसमा उल्लेख भएका विषय तथा बजेट कार्यक्रमहरु सरकारलाई निर्देशनको रुपमा जाने छ । तत्कालीन विपक्षी दलहरुले उठाउँदै आएका बजेट तथा कार्यक्रमहरु समेटिएका योजनाहरुमा प्रदेश सरकारले बजेट विनियोजन गरी कार्यान्वयन गर्नुपर्ने हुन्छ ।

त्यस्तै १५ मिनेट सञ्चालन भएर प्रदेशसभा बैठक अर्को सूचना नभएसम्मका लागि स्थगित गरिएको छ । प्रदेशसभाका सभामुख भुवन कुमार पाठकले प्रदेशसभाको बैठक अर्को सूचना नभएसम्मका लागि स्थगित गरेको जानकारी गराएका हुन् ।