अनेरास्ववियु रामेछापको अध्यक्षमा हिमाल बोहोराले गरे उम्मेदवारी दिने तयारी

रामेछाप । नेकपा एमालेको भातृ विद्यार्थी संगठन अनेरास्ववियु रामेछापको १३ औं अधिवेशनको सरगर्मी मन्थलीमा बढिरहेको छ । अनेरास्ववियुले अधिवेशनकै तयारी गर्दै दुई महिना अघिदेखि ६४ वटै वडामा रहेका विभिन्न विद्यालयमा पुगेर संगठन विस्तार गरिसकेको छ ।

भदौ २९ र ३० गते अनेरास्ववियु रामेछापले १३ औं जिल्ला अधिवेशन तथा प्रथम अखिल महोत्सवको रूपमा आयोजना गर्दैछ ।

यसैबीच मन्थली नगरपालिका १० चनखुमा जन्मेका अनेरास्ववियु रामेछापको चर्चित विद्यार्थी नेता हिमाल बोहोराले अध्यक्ष पदको लागि आफ्नो नाम अघि सारेका छन् ।
२०६६ साल देखि प्रारम्भिक कमिटीको जिम्मेवारी सम्हाल्दै अनेरास्ववियुको राजनीति सुरु गरेका बोहोराले झन्डै डेढ दशक समय अनेरास्ववियुको लागि दिइसकेका छन् । `सानै उमेरमा सुरु गरेको अनेरास्ववियुको यात्रा आजसम्म आइपुग्दा १४ बर्ष भन्दा बढी भएछ । ´बोहोरा भन्छन् -`स्कुल कमिटी देखि जिल्ला कमिटीको धेरै ठाउँमा बसेर संगठनले दिएको जिम्मेवारीलाई पूरा गर्दै आएको छु । त्यसैले अब जिल्ला अध्यक्षको भुमिकामा रहेर अनेरास्ववियु रामेछापलाई थप मजबुत बनाउने इच्छा छ ।´

अनेरास्ववियुमा सुरुदेखि नै सक्रिय रूपमा संगठन निर्माण र विद्यार्थी हकहितका निम्ति अग्रणी भुमिका खेल्दै आइरहेका बोहोरा २०६८ सालमा इलाका कमिटी सदस्यको रूपमा रहेका थिए । त्यस्तै २०६९ सालमा क्षेत्रीय कमिटी सदस्य हुँदै १२ औं जिल्ला अधिवेसनमा बोहोरा जिल्ला कमिटी सदस्य बनेका थिए । यस्तै नेकपा एमाले र माओवादी केन्द्र बिच एकता हुँदा अनेरास्ववियु जिल्ला सचिवालय सदस्य र मन्थली नगर इन्चार्ज समेत बनेर आफ्नो जिम्मेवारी पूरा गरिसकेका छन् ।

हाल जिल्ला कमिटी सदस्य सह संयोजक रहेका बोहोरा जिल्ला अध्यक्ष पदमा उम्मेदवारी दिने तयारीमा रहेका छन् । विद्यार्थीहरु माझ लोकप्रिय बोहोराले अध्यक्ष पदमा उम्मेदवार दिने तयारीलाई नेताकार्यकर्ताले स्वभाविक रूपमा लिएका छन् । उनी निकट एक विद्यार्थीका अनुसार यो पटक बोहोराको लागि राम्रै अवसर रहेकोे छ ।

बोहोरा संगै जिल्ला अध्यक्षमा पुष्कर भट्टराई र मदन खड्का लगायतका विद्यार्थी नेताहरुको पनि दावी रहेकोे छ ।