खडका ईलेक्ट्रिक एण्ड सप्लायर्समा नया वर्ष २०८१ को उपलक्ष्यमा शुभकामना सहित इलेक्ट्रोनिक्स सामानमा बिशेष छुटको ब्यावस्था छ।



भारतबाट ल्याइएको लाखौँको पटाका झापाबाट बरामद


 संवाददाता   October 10, 2019   232 जनाले पढ़िसके




असोज २३, २०७६ झापा
दिपावली तथा छठ पर्वलाई लक्षित गरी भारतबाट ल्याइएको पटाका प्रहरीले बरामद गरेको छ। नेपालमा प्रतिबन्धित पटाका तस्कर समूहले चोरी निकासीको बाटो प्रयोग गरेर नेपाल भित्र्याउने क्रममा प्रहरीले बरामद गरेको हो।
भारत बिहार राज्यसँग जोडिएको झापाका खुल्ला सीमा नाकाबाट ठुलो परिमाणमा पटका नेपाल भित्रिन्छ। यसै क्रममा झापाको कचनकवल नाकाबाट भित्र्याइएको पटकासहित एउटा मोटरसाइकल सशस्त्र प्रहरीले नियन्त्रणमा लिएको छ।
सशस्त्र प्रहरी बल २ नम्बर गण झापाबाट खटिएका सशस्त्र प्रहरी नायव निरीक्षक अंगद हरिजन दासको टोलीले हल्दीबारी गाउँपालिका ५ स्थित डाँगागाँउबाट दुई बोरा जगमग पटकासहित मोटरसाइकल नियन्त्रणमा लिएको सशस्त्र प्रहरी बल २ नम्बर गण झापाका सशस्त्र प्रहरी नायव उपरीक्षक प्रेम भण्डारीले जानकारी दिए।
मे १ प ३७१३ नम्बरको मोटरसाइकलमा हालेर बिर्तामोडतर्फ लैजाने क्रममा सशस्त्र प्रहरीले विशेष सूचनाको आधारमा पटका बरामद गरेको भण्डारीले बताए। बरामद गरिएको पटकाको नेपाली बजार मूल्य एक लाख रहेको प्रहरी अनुमान छ।
पटकालाई बिहीबार बिहान सशस्त्र प्रहरी बल २ नम्बर गण झापामा सरोकारावाला निकायको रोहबरमा नष्ट गरिएको उनले बताए। यता बरामद गरिएको मोटरसाइकललाई आवश्यक कारबाहीका लागि भन्सार बुझाइने उनको भनाई छ ।
यसअघि जिल्ला प्रहरी कार्यालय झापाबाट खटिएका प्रहरी टोलीले मेचीनगर नगरपालिका ६ स्थित तुर्केनीबाट अन्दाजी एक लाख रुपैयाँ बराबरको विस्फोटक पदार्थ बरामद गरेको थियो।
त्यस्तै प्रहरीले कनकाई नगरपालिका ५ स्थित सुरुङगाबाट अन्दाजी ७० हजार रुपैयाँ मूल्य बराबरको २९ बण्डल पटका बरामद गरी नष्ट गरिसकेको जनाइएको छ ।